聯生工業邨規劃調整 城規師憂步空置後塵

  【本報訊】工務局早前向城規會介紹路環聯生工業邨規劃調整研究,計劃放高、增加建築面積,以推動工業類型重新定位為中醫藥、數據中心等高新產業。新規劃不作諮詢,當局日後在規劃條件圖落實。城市規劃師林翊捷認為,工業用地規劃應該更加細緻,應有一整套的產業規劃,和經濟、產業數據去支持,現時政府介紹內容說服力不足,擔心倉促落實會步本澳許多工業區空置的後塵。
  看當局的簡介,除了中醫藥和數據中心,其餘用途尚未確定,局方解釋因為涉及園區公司招商情況。林翊捷認為不應如此,「政府要有個底大概做乜嘢,坦白講業主有個舖位咁大,睇下做飲食或零售才好說話,但而家政府無底,究竟要做啲乜嘢,做到幾大規模,對澳門未來發展有咩嘢幫助?呢啲嘢政策思路要清晰,而且要有數據去支持,然後城市的空間上去配合佢,而唔係反過嚟問城規有冇地方,有少少本末倒置」。
  林翊捷認同本澳需要保留一定工業用地,但規劃工業,與住宅或商業「千差萬別」,不同工業廠房的設計、限高、排污、電力等要求都不同。一項產業的規劃,尚要部署未來所需的發展空間,基建、運輸等設施的配合。而那麼近的橫琴又搞中醫藥會否重疊?他認為,要知道兩者如何分工,現時連希望邨內中醫藥的規模有多大、搞甚麼類型的中醫藥也不清楚。
  「淨係同你講起幾高、起喺邊,我唔可以話畀你聽啱定錯,但係呢個介紹無說服力。」他有感,由總規到現在,澳門都沒有一套完整的產業規劃,「呢個係幾遺憾」。主張提供更多資訊供城規會、社會討論,政府也應思考手上的資料是否充分,「如果真係咁少,真係拎返去研究吓先,計啱條數。」
  眼見北安工廈空置等例子比比皆是,林翊捷冀政府珍惜每一塊土地,「諗清楚先至用,好過好倉促咁去用咗,到最後無生意,或者搞唔成,就空咗響度。呢啲例子太多太多,如果今時今日澳門仲用呢一種方法或思維去搞工業的話,我係有啲擔心。」